أسما شريف منير تصبغ شعرها بالأسود

نشرت الإعلامية أسما شريف منير جلسة تصوير لها عبر حسابها الرسمي بموقع الصور إنستغرام، لدعم فلسطين، وذلك بالتزامن مع طوفان الأقصى والحرب على غزة.

وظهرت أسما شريف منير بالشعر الأسود وذلك بعد صبغة الشعر الأشقر التي اختارتها عند حلق شعرها، وجاءت هذه الجلسة لاستعراض مجموعة من السويتشرت الجديد لدعم فلسطين.

وعلقت على الصور قائلة: "لدعم فلسطين وجزء من الأرباح هنتبرع بيه لأهلنا في غزة… أنا بجد من يوم ما بدأت الأحداث وأنا مش عارفة اشتغل ولا عارفة أنزل الفيديو العادية بتاعتي، حسه بخجل غير عادي، وأنا مصدر رزقي الأساسي هو صناعة المحتوى والدعاية الشركات، مكنتش عارفة اعمل اي حاجة، وحاسة إني نفسي أساعد بأي شكل ومع تغير وتصاعد الأحداث قررنا نقاطع".

وتابعت: "من ضمن المقاطعة في استخدام المنتجات كمان قطعت الشغل معاهم، فاجالي فكرة ال hoodies دي حسيت إنها فكرة متكاملة الأركان، لأني مش حسه بتأنيب الضمير وأنا بعمل دعايا ليها وفي نفس الوقت بشتغل عشان أنا زي اي حد محتاجة شغلي وعندي التزامات، بس حسيت إني كده بشجع منتج محلي وبدعم القضية".

وأضافت: "بدعمي ليها ده إني بتبرع بجزء من الأرباح وينشر رسالة توعية عن الأحداث وبخلي اسمها باق.. وأنا أدعو كل صناع المحتوى إنهم يقدموا منتج مصري محلي بطريقتهم لدعم فلسطين وكلنا نشجع بعض عشان نعدي المحنة دي مع بعض"

كانت تصدرت أسما شريف منير التريند بعد حلق شعرها، حيث نشرت فيديو لها عبر حسابها الشخصي إنستغرام آب/ أغسطس الماضي، وهي تقوم بحلق شعرها، الأمر الذي فاجأ متابعيها بين مؤيد ومعارض.

وعلقت أسما على الفيديو: "شعري بقاله فترة بيقع جامد، ده غير إن من كتر العمايل أتحرق وبقى مش صحي خالص، قررت أنقذ قرار كان بقالي كتير أوي نفسي أخده، أبدا من جديد، أحرر نفسي، افتح صفحة جديدة، حقيقي هو قرار صعب جداً بس حسسني بقوة وتفاؤل"
وتابعت أسما شريف منير: "رميت ورايا حاجات كتيرة أوى بمجرد إني شلت شعري، قلبي كان بيدق جداً وبعديها حسيت إني مليانة أدرينالين.. خطوة جريئة ومرعبة بس حسه إني طالعة منها بدرس".

وظهرت أسما شريف منير في مهرجان القاهرة للدراما مساء نفس يوم الحلاقة، وهو الأمر الذي لاقى بعد التعليقات السلبية على مظهرها، وتصدرها محركات البحث.

وفي هذا الصدد، نشر الفنان شريف منير فيديو عبر حسابه الشخصي على إنستغرام، يرد فيه على منتقدي ابنته اسما بعدما حلقت شعرها وظهرت به في مهرجان القاهرة للدراما.

وقال شريف منير في الفيديو: "مساء الخير، بأكل سمك مشوي ورز أبيض، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا" متسائلاً: "إيه الغلط اللي هي عملته، تصرف عادي جدًا مفيهوش أي حاجة، أوعوا تفتكروا إني هاجي على بنتي عشان خاطر أكسب رضاكم.. دي بنتي اللي ماليش غيرها وبحبها".

وتابع شريف منير: "بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم أنها متكونش بتأذي حد".

وطالب شريف منير في الفيديو المنشور: "قبل ما تتكلموا بصوا على نفسكوا واتفرجوا على عيلتكو وعلى إخواتكو وعلى الناس اللي حواليكوا قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا".

واختتم شريف منير الفيديو قائلا: "بحب أكل السمك والرز بأيدي حتى في المحلات الفخمة جدًا تفتكروا دي قلة أدب مني ولا مفيش إتيكيت؟ على العموم ريحو نفسكوا وأهدوا شوية؛ لأن اللي حصل من بنتي مش غلط ومش عيب هي مغلطتش في حد فيكو ومغلطتش في نفسها وبعدين بنتي عندها 36 سنة وأم وعندها بنوتة ومسؤولة عن نفسها".

وأكد شريف منير: "وأنا أب مسؤول إني أحميها وهي حرة في تصرفاتها، أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها المهم إننا مش بنضر حد، سلام عليكم".